چُن دا چانن سورج دا لشکارا نئیں سی چھڈنا
ہتھ پیندا تے لوکاں نے اک تارا نئیں سی چھڈنا
تیرے قصے وچ ایک کڑما کن پڑوا کے رُلیا
میں لکھدا تے رانجھے تخت ہزارہ نئیں سی چھڈنا
جنے چھڈ کے مینوں میرے جوگا نہیں چھڈیا
سوچ رہیاواں اوہدے لئی، پنڈ سارا نئیں سی چھڈنا
پہلی پیشی جِند چھڑوا کے پکی توبہ کر لئی
ہو جاندا تے مینوں عشق، دوبارہ نئیں سی چھڈنا
دل دریائی لا سکدی دریاواں دے وچ تاری
جے چھلاں تے شک سی فیر کنارہ نئیں سی چھڈنا
شکر ہے اوہنے گل نہیں کیتی نہیں تے رب دی قسمے
ویلے اوہدی ونگ لئی کوئی سنیارہ نئیں سی چھڈنا
کھِلرے ہوئے ساں جے توں سندھو کنجنا نئیں سی سانوں
کھلرے کم دا کرکے ڈھیر کھلارا نئیں سی چھڈنا
چن دا چانن سورج دا لشکارا نئیں سی چھڈنا
ہتھ پیندا تے لوکاں نے اک تارا نئیں سی چھڈنا
(ارشاد سندھو)
No comments:
Post a Comment