سوچ دے اکھر ( کاشف تنویر کاشف ) رپورٹ : اعظم توقیر

 *پنجاب ہاؤس لاہور وِچ کتاب "سوچ دے اکھر"  تے ماں بولی مشاعرہ وِچ مہمانِ خاص رلت کرکے مجمانی دا فرض نبھان دا اعزاز ۔۔۔* !!!

 تقریب دی جھلکیاں دی رپورٹ سجناں ،مِتراں دی سیوا وِچ 

رپورٹ 

: اعظم توقیر 

تخت ہزارے دے واسی شاعر ۔۔کاشف تنویر کاشف۔۔دی کتاب ۔۔سوچ دے اکھر۔۔دی مُکھ وکھالی تے مشاعرہ 

  کاشف تنویر کاشف  دی  شاعری اجوکے  دُکھاں ، درداں دی کہانی ایں:ڈاکٹر جواز جعفری

مدثر اقبال بٹ ہوریں پنجابی زبان نال کمٹڈ نیں:صدر مشاعرہ

کاشف تنویر جرمنی ریہہ کے وی اپنے وسیب نوں نہیں  بھلیا:اعظم توقیر

مشاعرے وچ رلتی شاعراں  کتاب چھپن تے کاشف تنویر کاشف نوں ودھائی دتی

کسے وی دیس وچ وسن والے اوورسیز اوس دیس وچ اپنے ملک دے سفیر تے ترجمان ہندے نیں۔اوہ اپنے  کردار،اپنی بولی تے ورتارے راہیں نا صرف اوس دیس دےلوکاں دے دلاں وچ گھر کردے نیں سگوں اوہناں نوں ایک سنیہا وی دیندے نیں کہ ساڈے دیس دی بولی کیہ اے،ساڈا کلچر کیہ اے،ساڈے ورتارے کیہ نیں۔

پاکستان دے لَکھنا وسنیک روزی روٹی  تے علم دی تس دور کرن لئی دوجے دیساں وچ وس رہے نیں۔بوہتے لوکی تے اپنی روزی روٹی کماندے تے گھراں نوں پرت آئوندے نیں پر کجھ اجیہے وی نیں جیہڑے  دوجے دیساں وچ اپنے ملک دا ناں اُچا کررہے نیں ۔انج دے متراں وچ اک ناں ضلع سرگودھا دے واسی شاعر تے براڈ کاسٹر کاشف تنویر کاشف ہوراں دا وی اے۔

کاشف تنویر کاشف بنیادی طور تے ضلع سرگودھا تحصیل کوٹ مومن دے جگ دھمے قصبے تخت ہزارے دا وسنیک اے۔جیہڑا 2004نوں جرمنی گیا تے اوتھے جا کر روزی روٹی دے نال نال پنجابی زبان دا کاما وی بن گیا۔کاشف تنویر کاشف پنجابی زبان دا شاعر تے فیس بک تے’’ سانجھا ویہڑا پنجاب دا‘‘دے ناں تو پروگرام وی کردا اے جیہڑا جرمنی سمیت لہندے چڑھدے پنجاب وچ بڑا مقبول اے۔

کاشف تنویر کاشف دی پنجابی شاعری دی پہلی کتاب ’’سوچ دے  اکھر‘‘دے سرناویں نال 2023 وچ چھاپے چڑھی تے ویکھدیاں ای ویکھدیاں پنجابی زبان نال پیار کرن والیاں دے دلاں وچ اُتر گئی۔

اس کتاب وچ حمد،نعت تے منقبت ، غزلاں تے نظماں شامل نیں ۔کاشف تنویر دا شعر کہن دا ڈھنگ بڑا سادہ تے نویکلا جیہا اے۔اوہدے شعر پڑھن آلے نوں  گنجھلاں وچ  نہیں پاندے سگوں سدھے دل تے لگدے نیں ۔ایس کتاب دی  لہندے توں اڈ چڑھدے پنجاب دے لکھاریاں وی سلاہنا کیتی اے ۔ایہ کتاب بھاویں کاشف تنویر دے ادبی پندھ دا پہلا قدم اے پر منزل اکھاں وچ ہووے،نیت ٹھیک ہووے تے بندہ کدی کراہے نہیں پوندا۔ایہہ گل بڑی سلاہن جوگ اے جوں  کاشف تنویر جرمنی ریہہ کے وی اپنے وسیب نوں نہیں  بھلیا۔

پنجاب ہائوس دے چیئرمین تے پنجابی زبان دے وڈے آگو مدثر اقبال بٹ ہوریں ہمیش پنجابی زبان تے ادب لئی کم کرن آلیاں نال پیار کردے نیں ۔مدثر اقبال بٹ ہوراں دے پنجابی زبان لئی  بنائے  گئے پنجاب ہائوس لہور وچ ’’  بزم عابد تمیمی پاکستان ‘‘ولوں    پشلے دناں کاشف تنویر کاشف دی کتاب ’’سوچ دے اکھر‘‘ دی مکھ وکھالی تے مشاعرے دا پربندھ کیتا گیاجہدی اگوائی ملک دے منے پرمنے شاعر تے پارکھ ڈاکٹر جواز جعفری ہوراں کیتی۔تقریب دے اچیچے پروہنیاں وچ مشہور شاعر  صغیر احمد صغیر،فاخرہ انجم،محسن جعفری تے ڈاکٹر سعید اقبال سعدی ہوریں رلتی سن۔ایس  خوبصورت اکٹھ دی مجمانی بندہء خاکسار ( نوید مغل) ہوراں بڑے سچجے سبھا نال  کیتی۔

مشاعرے دے دوجے رلتی شاعراں وچ  مظہر محسن،احسان شمس،مزمل ناطق بلوچ،تنویر حیدری،عروج زیب،ندیم حیدری،اثرہ اسلم،بشیر ندیم،آصف نقوی،یٰسین یاس،احتشام حسن،افضل پارس ،اظہر عباس،نوید مغل،عبدالرحٰمن رضوان،ناصر انجم،نوازش رضا ،قسیم جعفری،بشیر کمال  تے دوجے شامل سن۔ایہ خوبصورت محفل اللہ سوہنے دی حمد تے نبی پاکؐ دی نعت نال شروع ہوئی جہدی سعادت منے پرمنے نعت خواں نبیل نظامی ہوراں دے حصے آئی۔ایہدے مگروں مشاعرہ شروع ہو یا ،مجمان نے اپنے شعرسنا کے پہلے شاعر نوں کلام دی دعوت دتی۔

مشاعرے وچ پڑھے گئے کلام وچوں کجھ ونگیاں حاضر نیں ۔

گل میں یار دی دسدا دسدا 

رو پینا واں ہسدا ہسدا

کیہڑا جادو ٹونے کردا

وسدا نہیں میں وسدا وسدا

۔۔۔۔۔

ہجر دی کندھ اُساری جاندائے

ہجر دی سولی چاہڑی جاندائے

ٹوٹے کرکے دل دے کاشف

سانجھ دے ورقے پاڑی جاندائے

کاشف تنویر کاشف

خواہش نام و نمائش مسترد کرتے ہوئے

میں کبھی چہرہ نہیں تکتا مدد کرتے ہوئے

۔۔

 موت بٹتی تھی سر کوچہ و بازار جہاں

میں نے اس شہر میں جینے  ہے جواز

مری آزادی مکمل اسی دانے سے ہوئی

ڈاکٹر جواز جعفری

ہمارے دیس میں دستور یہ بنایا گیا

سوال جس نے اٹھایا اُسے اٹھا یاگیا

محسن جعفری

اس خاک پہ ہے آپ کا فیضان سراپا 

ہے احسنِ تقویم  جو انسان سراپا

گردوں پہ  ملائک ہوئے حیران سراپا

ہیں آپ تو قرآن ہی قرآن سراپا

ڈاکٹر سعید اقبال سعدی

ساڈا کدھرے ناں وی کوئی نئیں تیری گل اے ایہ کوئی گل اے

ساڈے سِر تے تیری ساری بھل و بھل اے ایہ کوئی گل اے

ساڈے لئی نہ رہن نوں تھاں ایں نہ کوئی رُکھ اے نہ کوئی چھاں اے

تیرا ہر گھر لگدا جیویں تاج محل اے، ایہ کوئی گل اے

تینوں دل دا مسئلہ دسیا ایہ وی دسیا مسئلہ توں ایں 

تیرے ولوں کوئی تسلی نہ کوئی حل اے ایہ کوئی گل اے

 صغیر احمد صغیر

پیناواں ، کم ظرفاں ہتھوں نہیں پیندا

رِندآں،کدی وی بالاں ہتھوں نہیں پیندا

بوتل پی کے وی میں تسا ریہہ جانا

جیہڑے دینہہ وی یاراں ہتھوں نہیں پیندا

لہو پیندے نیں جیہڑے وی مزدوراں دا

میں اوہناں خنزیراں ہتھوں نہیں پیندا

اعظم توقیر

رو کے اکھیں ملیاں تے 

اوہدا مکھ سی تلیاں تے

پنڈ نوں چھڈ تے چلے او

چیتے آئیاں گلیاں، تے

مزمل ناطق

سینے لا کے بیٹھا ایں اک یار دا دُکھ      

     جھلیا اکھاں کھول تے تک سنسار دا دُکھ

 ویکھی نہیئوں ویڈیو وِکدے بالاں دی

انٹرنیٹ تے چڑھیا پیو بیمار دا دُکھ

مظہر محسن

 سوچاں تے افکار بدلنے پینے نیں 

یارو مینوں یار بدلنے پینے نیں

سیاستدان نہ بدلو سارے ہکو جہے 

ایہناں دے گل ہار بدلنے پینے نیں

احسان شمس

میرے کول نیں گلاں دو 

اپنا    کر   یا  میرا    ہو 

مر  مرا   کے  اپڑے   آں 

انج  نہ  سجنا  بوہا   ڈھو 

یٰسین یاس

دل پر تمہارا چہرہ یوں تصویر ہو گیا

جیسے محل وفائوں کا تعمیر ہو گیا

کہنے میں دو ہی لفظ ہیں مت جائو زیب جی

ہر لفظ میرے پائوں کی زنجیر ہو گیا

عروج زیب

نہیں تیرے نظر انداز کرنے پر شکایت

مجھے اپنے سنورنے پر ندامت ہو رہی ہے 

۔۔۔

بنا سوال جو خیرات مل رہی ہے میاں

یہاں کسی کی پرانی صدا لگی ہوئی ہے 

احتشام حسن

منظر نئے نکور دکھانے کی بات ہے

انگلی پہ کائنات گھمانے کی بات ہے

۔۔

یہ  دانش خاک دانش ہے کرے کوئی بھرے کوئی

نوازش ایک سازش ہے کرے کوئی بھرے کوئی

اثرہ اسلم

ایہ نیں  خانی خان محبت کردے نیں

ماڑے وی بھائی جان محبت کردے نیں

میں تاں ایسے چا اچ اکھیں لا بیٹھا

سنیا سی انسان محبت کردے نیں

تنویر حیدری

_____________________

تولہ رکھ یا ماسارکھ 

سجناں اِکو پاسا رکھ 

اّکھاں وِچ سمندر ہووے 

ہوٹھاں اُتےہاسا رکھ 

_____________________

میں آں آپ سمندر لوکو 

وانگ مسیتاں مندر لوکو 

میں سپاں نوں کِیلن ٹُریا

بن گئے سپ قلندر لوکو 

نوید مغل

_____________________

پیریں چھالے ویکھ کے بیٹھاں

اگ ہجر دی سیک کےبیٹھاں

بغضاں مارے بیلی لبھے

رشتے سارے ویکھ کے بیٹھاں

ندیم حیدری

کئی سرکاراں آئیاں گئیاں ہو گئیاں

جتاں ہاراں آئیاں گئیاں ہو گئیاں

توں کیہ شے ایں تیتھوں پہلاں رستے وچ

کئی  دیواراں آئیاں گئیاں ہو گئیاں

بشیر کمال

مشاعرے دے اخیر تے تقریب دے آگو ڈاکٹر جواز جعفری ہوراں آکھیا  کاشف تنویر کاشف اجوکی پنجابی شاعری وچ خوبصورت وادھا اے،اوہدی شاعری ساڈے آل دوالے کھلرے دکھاں تے درداں دی کہانی ایں،امید کرناواں کاشف تنویر دا ایہ ادبی پندھ رکے گا نہیں تے اوہ  ہور کئی کتاباں پنجابی ادب نوں دان کرے گا۔پنجاب ہائوس  بارے گل کردیاں اوہناں آکھیا کہ مدثر اقبال بٹ ہوریں پنجابی زبان نال کمٹڈ نیں جہدی اک مثال  پنجاب ہائوس دا ایہہ خوبصورت ہال اے جیہڑا اوہناں  شاعراں ادیباں لئی وقف کیتا ہویا اے ۔