اجڑی پجڑی سدھراں دی تصویر نہ دیکھی جاوے
کیہ لکھیا تقدیر دے وچ تقدیر نہ دیکھی جاوے
رانجھے دا حق کھوہ کے کھیڑا خشی مناندا پھر دا
ڈولی چڑھدیاں چیکاں مار دی ہیر نہ دیکھی جاوے
کہدے سہاگ دا جوڑا جھکھڑاں کیتا لیراں لیراں
کیکراں اتے ٹنگی ہوئی لیر نہ دیکھی جاوے
ہجر وچھوڑا موتوں بھیڑا نین غماں وچ روندے
درداں ہنجواں آہواں دی جاگیر نہ دیکھی جاوے
امن امان لئی تر سے لوکی ازلوں پے نہیں روندے
ظلماں جبراں والی ہوئی اخیر نہ دیکھی جاوے
دل کملا مر جانا جھلا عشق توں باز نہ آوے
روح کرلاوے تڑفے وچ سریر نہ دیکھی جاوے
کہوے غفار رندھاوا شالا اک مک وسن سارے
وچ بھرانواں وجی ہوئی لکیر نہ دیکھی جاوے
شاعر : ڈاکٹر عبدالغفار رندھاوا
No comments:
Post a Comment